అశోక్ నగర్‌లో పురాతన శివాలయం కూల్చివేతపై ఆగ్రహం..

• కలెక్టర్ జోక్యం కోరిన బీజేపీ నేత రాణా ప్రతాప్ రెడ్డి

న్యూస్ డెస్క్ : నర్సంపేట నియోజకవర్గం ఖానాపూర్ మండలం అశోక్ నగర్‌లో ఉన్న కాకతీయుల కాలానికి చెందిన పురాతన శివాలయం కూల్చివేతపై తీవ్ర వివాదం చెలరేగింది. సుమారు 700-800 ఏళ్ల చరిత్ర కలిగిన మట్టి కోట శివాలయాన్ని ఇంటిగ్రేటెడ్ స్కూల్ నిర్మాణం పేరుతో కూల్చివేయడం పట్ల భారతీయ జనతా పార్టీ (బీజేపీ) వరంగల్ జిల్లా ప్రధాన కార్యదర్శి డాక్టర్ గోగుల రాణా ప్రతాప్ రెడ్డి తీవ్రంగా ఖండించారు.

ఈ సందర్భంగా ఆయన మాట్లాడుతూ, చారిత్రక వారసత్వాన్ని కాపాడాల్సిన పురావస్తు శాఖ, దేవాదాయ శాఖ అధికారులు నిర్లక్ష్యం వహించారని ఆరోపించారు. ఒక పురాతన ఆలయాన్ని కూల్చివేస్తున్నా అధికారులు స్పందించకపోవడం దురదృష్టకరమని అన్నారు.

శివాలయం కూల్చివేత ఘటన స్థలాన్ని పరిశీలిస్తున్న రాణా ప్రతాప్ రెడ్డి

కలెక్టర్‌కు విజ్ఞప్తి: జిల్లా కలెక్టర్ తక్షణమే సంఘటనా స్థలాన్ని పరిశీలించి, హిందువుల మనోభావాలను గౌరవిస్తూ న్యాయం చేయాలని ఆయన డిమాండ్ చేశారు. ఆలస్యం చేస్తే ప్రజా ఆగ్రహాన్ని ఎదుర్కోవాల్సి వస్తుందని హెచ్చరించారు.

రెండు రోజుల అల్టిమేటం: ఈ ఘటనకు బాధ్యులైన కాంట్రాక్టర్ వెంటనే క్షమాపణ చెప్పాలని, కూల్చిన చోటే అదే శిల్పకళతో ఆలయాన్ని పునర్నిర్మించాలని డిమాండ్ చేశారు. అలాగే ఇంటిగ్రేటెడ్ స్కూల్‌ను మరో ప్రభుత్వ స్థలానికి మార్చాలని సూచించారు.

భూములపై డిమాండ్: ఆలయానికి సంబంధించిన 14 ఎకరాల భూమిని ప్రభుత్వం సీజ్ చేసి దేవాదాయ శాఖ పరిధిలోకి తీసుకురావాలని కోరారు.

తీవ్ర హెచ్చరిక: రెండు రోజుల్లో డిమాండ్లు నెరవేర్చకపోతే బీజేపీ ఆధ్వర్యంలో భారీ ఆందోళనలు చేపడతామని హెచ్చరించారు. కాంట్రాక్టర్ ఇల్లు, మద్దతిస్తున్న నాయకుల ఇళ్లను ముట్టడిస్తామని స్పష్టం చేశారు.

అభివృద్ధికి తమకు వ్యతిరేకత లేదని, కానీ చరిత్ర, సంస్కృతి, దేవాలయాల్ని ధ్వంసం చేసి చేసే అభివృద్ధిని అంగీకరించబోమని డాక్టర్ రాణా ప్రతాప్ రెడ్డి పేర్కొన్నారు. సమస్యపై కలెక్టర్ తక్షణ చర్యలు తీసుకోవాలని లేకపోతే రాష్ట్రవ్యాప్త ఉద్యమం తప్పదని హెచ్చరించారు.