• బీసీ కమిషన్ చైర్మన్ నిరంజన్కు వినతిపత్రం అందజేసిన గుజ్జ సత్యం
• ప్రభుత్వం తక్షణమే బకాయిలు విడుదల చేసి విద్యార్థులకు న్యాయం చేయాలి
హైదరాబాద్, జూన్ 27: తెలంగాణ రాష్ట్ర బీసీ కమిషన్ చైర్మన్ నిరంజన్ను జాతీయ బీసీ సంక్షేమ సంఘం జాతీయ ఉపాధ్యక్షులు గుజ్జ సత్యం మర్యాదపూర్వకంగా కలిసి రాష్ట్రంలోని లక్షలాది మంది విద్యార్థులు ఎదుర్కొంటున్న ఫీజు రీయింబర్స్మెంట్ సమస్యపై వినతిపత్రం సమర్పించారు. ఫీజు రీయింబర్స్మెంట్ పథకాన్ని గతంలో అమలైన పాత విధానంలోనే కొనసాగిస్తూ, పెండింగ్లో ఉన్న నిధులను తక్షణమే విడుదల చేయించేలా రాష్ట్ర ప్రభుత్వంపై బీసీ కమిషన్ ఒత్తిడి తీసుకురావాలని ఆయన విజ్ఞప్తి చేశారు.
ఈ సందర్భంగా గుజ్జ సత్యం మాట్లాడుతూ, ఉన్నత విద్య పేద, బీసీ, ఎస్సీ, ఎస్టీ, మైనారిటీ మరియు ఆర్థికంగా వెనుకబడిన విద్యార్థుల హక్కు అని, ఫీజు రీయింబర్స్మెంట్ పథకం వారి విద్యాభవిష్యత్తుకు జీవనాడిగా నిలుస్తోందని అన్నారు. విధాన మార్పులు, నిధుల జాప్యం కారణంగా వేలాది మంది విద్యార్థులు ఆర్థిక ఇబ్బందులు ఎదుర్కొంటుండగా, విద్యాసంస్థలు కూడా తీవ్ర సంక్షోభంలోకి నెట్టబడుతున్నాయని ఆందోళన వ్యక్తం చేశారు.
రాష్ట్రంలో వేల కోట్ల రూపాయల ఫీజు రీయింబర్స్మెంట్ బకాయిలు ఇంకా విడుదల కాకపోవడంతో విద్యార్థులపై ఫీజుల భారం పెరిగిందని, అనేక కుటుంబాలు అప్పులు చేసి పిల్లల చదువులు కొనసాగించే పరిస్థితి నెలకొందని పేర్కొన్నారు. విద్యను ఆర్థిక స్థోమతతో ముడిపెట్టే పరిస్థితి ఏర్పడితే సామాజిక న్యాయ స్ఫూర్తికే విఘాతం కలుగుతుందని ఆయన హెచ్చరించారు.
ఇటీవల ఫీజు రీయింబర్స్మెంట్ అంశంపై తెలంగాణ హైకోర్టు కూడా ప్రభుత్వాన్ని ప్రశ్నించడం, పెండింగ్ బకాయిలు, అమలు విధానంపై వివరణ కోరడం పరిస్థితి తీవ్రతను స్పష్టంగా తెలియజేస్తోందని గుజ్జ సత్యం పేర్కొన్నారు. విద్యార్థులు, తల్లిదండ్రులు, విద్యాసంస్థలు నెలల తరబడి ఎదురుచూడాల్సిన పరిస్థితి ప్రజాస్వామ్య పాలనకు తగదన్నారు.
ప్రభుత్వం వెంటనే:
* పెండింగ్లో ఉన్న ఫీజు రీయింబర్స్మెంట్ బకాయిలను పూర్తిగా విడుదల చేయాలి.
* పాత విధానంలోనే ఫీజు రీయింబర్స్మెంట్ను నిరంతరాయంగా అమలు చేయాలి.
* విద్యార్థులపై ముందస్తు ఫీజుల భారం పడకుండా స్పష్టమైన చర్యలు తీసుకోవాలి.
* విద్యాసంస్థలు ఆర్థిక ఇబ్బందులు ఎదుర్కోకుండా సమయానుకూలంగా నిధులు విడుదల చేయాలి.
బీసీ కమిషన్ రాజ్యాంగబద్ధ సంస్థగా ప్రభుత్వం దృష్టికి ఈ సమస్య తీవ్రతను తీసుకెళ్లి విద్యార్థుల ప్రయోజనాలను పరిరక్షించేలా తక్షణ చర్యలు తీసుకోవాలని గుజ్జ సత్యం కోరారు.
ఈ కార్యక్రమంలో జాతీయ బీసీ సంక్షేమ సంఘం సిద్దిపేట జిల్లా ప్రధాన కార్యదర్శి అశోక్ తదితరులు పాల్గొన్నారు.