• మంత్రి పొన్నం ప్రభాకర్‌కు వినతిపత్రం అందజేత
హైదరాబాద్: ఆచార్య కొండా లక్ష్మణ్ బాపూజీ కుమార్తె డా. పవిత్ర వాణి బాపూజీకి గవర్నర్ కోటాలో ఎమ్మెల్సీ పదవి కేటాయించాలని కోరుతూ తెలంగాణ రాష్ట్ర పద్మశాలి సంఘం నాయకులు బీసీ సంక్షేమశాఖ, రవాణాశాఖ మంత్రి పొన్నం ప్రభాకర్‌ను కలిసి వినతిపత్రం అందజేశారు.
ఈ సందర్భంగా తెలంగాణ రాష్ట్ర పద్మశాలి సంఘం రాష్ట్ర అధ్యక్షులు వల్లకటి రాజకుమార్, రాష్ట్ర కార్యదర్శులు అప్పం శ్రీనివాస్, గంజి శ్రీనివాస్, ఉపాధ్యక్షులు మేకల జయరాములు, రాజకీయ విభాగం అధ్యక్షులు గుంటి నాగేష్‌తో పాటు కమిటీ సభ్యులు మంత్రి పొన్నం ప్రభాకర్‌ను కలిశారు.
తెలంగాణ రాష్ట్ర సాధన ఉద్యమంలో ఆచార్య కొండా లక్ష్మణ్ బాపూజీ చేసిన సేవలు, పద్మశాలి సమాజ అభ్యున్నతికి ఆయన అందించిన కృషిని గుర్తుచేస్తూ, ఆయన కుమార్తె డా. పవిత్ర వాణి బాపూజీకి గవర్నర్ కోటాలో ఎమ్మెల్సీ పదవి కల్పించాలని నాయకులు మంత్రిని కోరారు.
డా. పవిత్ర వాణి బాపూజీకి ఎమ్మెల్సీ పదవి కల్పించడం ద్వారా కొండా లక్ష్మణ్ బాపూజీ సేవలకు తగిన గుర్తింపు లభిస్తుందని, పద్మశాలి సమాజానికి రాజకీయ ప్రాతినిధ్యం దక్కుతుందని సంఘం నాయకులు తమ వినతిపత్రంలో పేర్కొన్నారు.
ఈ విజ్ఞప్తిని రాష్ట్ర ప్రభుత్వం దృష్టికి తీసుకెళ్లి, డా. పవిత్ర వాణి బాపూజీకి ఎమ్మెల్సీ పదవి కల్పించేలా కృషి చేయాలని మంత్రి పొన్నం ప్రభాకర్‌ను తెలంగాణ రాష్ట్ర పద్మశాలి సంఘం నాయకులు కోరారు.
తెలంగాణ రాష్ట్ర పద్మశాలి సంఘం తరఫున రాష్ట్ర అధ్యక్షులు, కార్యదర్శులు, ఉపాధ్యక్షులు, రాజకీయ విభాగం అధ్యక్షులు, కమిటీ సభ్యులు ఈ కార్యక్రమంలో పాల్గొన్నారు.