తెలంగాణ ఎక్స్ ప్రెస్ న్యూస్ : తెలంగాణ వైద్య ఆరోగ్యశాఖ మంత్రి డా. దామోదర రాజనర్సింహ, కల్వకుర్తి ఎమ్మెల్యే కసిరెడ్డి నారాయణరెడ్డి ఆదేశాల మేరకు రంగారెడ్డి జిల్లా వైద్య ఆరోగ్యశాఖ అధికారి డా. స్వర్ణ కుమారి శనివారం ఆమనగల్లు పట్టణంలోని ప్రభుత్వ ప్రాథమిక ఆరోగ్య కేంద్రాన్ని ఆకస్మికంగా తనిఖీ చేశారు.
ఈ సందర్భంగా ఆసుపత్రిలోని రికార్డులు, హాజరు పట్టికలను పరిశీలించారు. డ్రాయింగ్ అధికారి మైమున, వైద్యాధికారి ఊర్మిళ, ఆరోగ్య విద్యాధికారి తిరుపతి రెడ్డి, పబ్లిక్ హెల్త్ నర్స్, హెడ్ నర్స్ ఏసుమని, ఫార్మసిస్ట్ ఇందిర తదితరులతో సమీక్ష నిర్వహించారు. ఇప్పటివరకు నమోదైన విషజ్వరాల కేసులు, రోగులకు అందించిన చికిత్స వివరాలను అడిగి తెలుసుకున్నారు.
అంతేకాకుండా గర్భిణీల నమోదు, అధిక ప్రమాద గర్భిణీల రిజిస్టర్, గర్భిణీల పరీక్షల రిజిస్టర్, ప్రయోగశాల, మందుల పంపిణీ, టీకాలు, క్షయ, కుష్ఠు, ఈ-ఆరోగ్యం, అంటువ్యాధులు కాని వ్యాధులు, మానవ పాపిలోమా వైరస్ టీకా, తల్లి-శిశు ఆరోగ్యం, బహిర్గత రోగులు, అంతర్గత రోగులు తదితర రికార్డులను పరిశీలించారు. కుక్క, పాము, కోతి కాటుకు సంబంధించిన టీకాల నిల్వలను కూడా తనిఖీ చేశారు. ప్రమాదాలకు గురైన వారికి అత్యవసర చికిత్స, గర్భిణీల ప్రసవాలు, తల్లి-శిశు ఆరోగ్య సేవలపై అధికారులకు పలు సూచనలు చేశారు. గర్భిణీలకు ఎలాంటి ఇబ్బందులు కలగకుండా మెరుగైన వైద్య సేవలు అందించాలని ఆదేశించారు.
అనంతరం సామాజిక ఆరోగ్య కేంద్రం నూతన భవన నిర్మాణ పనులను మైమున, వైద్య సిబ్బందితో కలిసి పరిశీలించారు. మరో నెల నుంచి రెండు నెలల్లో భవనాన్ని అందుబాటులోకి తీసుకురావాలని, అసంపూర్తి పనులను త్వరగా పూర్తి చేసి ప్రజలకు వైద్య సేవలు అందించేలా చర్యలు తీసుకోవాలని అధికారులను ఆదేశించారు.
ఆమనగల్లు ప్రభుత్వ ఆసుపత్రిని ఆధునిక సదుపాయాలతో అభివృద్ధి చేసి ప్రజలకు మెరుగైన వైద్య సేవలు అందించేందుకు చర్యలు తీసుకుంటున్నట్లు డా. స్వర్ణ కుమారి తెలిపారు. ఆసుపత్రిలో మందుల నిల్వలు, ముఖ్యంగా పాము, కుక్క, కోతి కాటుకు సంబంధించిన మందులు, టీకాల లభ్యతపై ఆరా తీశారు.
వర్షాకాలం నేపథ్యంలో మలేరియా, టైఫాయిడ్, డెంగ్యూ వంటి విషజ్వరాలతో పాటు శ్వాసకోశ, సీజనల్ వ్యాధులు ప్రబలకుండా అప్రమత్తంగా ఉండాలని సూచించారు. రోగులకు ఎలాంటి అసౌకర్యం కలగకుండా వైద్యులు, సిబ్బంది నిరంతరం అందుబాటులో ఉండాలని, విధుల్లో అలసత్వం వహించరాదని స్పష్టం చేశారు. ప్రతి ఒక్కరూ సమయపాలన పాటిస్తూ ప్రజలకు మెరుగైన వైద్య సేవలు అందించాలని ఆదేశించారు.
ఈ తనిఖీలో వైద్యాధికారి డా. మైమున, హెడ్ నర్స్ ఏసుమని, ఫార్మసిస్ట్ ఇందిరా, ప్రయోగశాల సాంకేతిక నిపుణుడు వేణుగోపాల్ రెడ్డి, నర్సింగ్ అధికారులు దేవేందర్, మధు, రేణుక, వైద్య సిబ్బంది శ్రీను, సురేష్ తదితరులు పాల్గొన్నారు.