• రాజ్యసభ సభ్యులు వేం నరేందర్ రెడ్డికి వినతిపత్రం అందజేత
తెలంగాణ ఎక్స్ప్రెస్ న్యూస్, హైదరాబాద్: తెలంగాణ చేనేత ఉత్పత్తుల ఎగుమతి కోసం ప్రత్యేక కార్పొరేషన్ ఏర్పాటు చేయాలని కోరుతూ రాజ్యసభ సభ్యులు శ్రీ వేం నరేందర్ రెడ్డి గారికి వినతిపత్రం అందజేశారు. శ్రీ రామకృష్ణాపురం డివిజన్ కాంగ్రెస్ పార్టీ అధ్యక్షుడు, పద్మశాలి సంఘం ఎల్బీనగర్ సర్కిల్ అధ్యక్షులు పున్న గణేష్ నేత ఆధ్వర్యంలో, పద్మశ్రీ అవార్డు గ్రహీత గజం అంజయ్య నేతృత్వంలో ప్రతినిధి బృందం ఆయన నివాసంలో కలిసింది.
వినతిపత్రంపై ఎంపీ సానుకూలంగా స్పందించారు. ఈ అంశాన్ని ముఖ్యమంత్రి ఎనుముల రేవంత్ రెడ్డి, చేనేత, జౌళిశాఖ మంత్రి తుమ్మల నాగేశ్వరరావు దృష్టికి తీసుకెళ్లి, త్వరలో కార్పొరేషన్ ఏర్పాటుకు కృషి చేస్తానని హామీ ఇచ్చారు.
ప్రధాన డిమాండ్లు: పోచంపల్లి ఇక్కత్, పుట్టపాక డబుల్ ఇక్కత్, తేలియా రుమాల్, గద్వాల్ చీరలు, సిద్దిపేట గొల్లభామ చీరలు, నారాయణపేట చీరలు, వరంగల్ తివాచీలు వంటి విశిష్ట ఉత్పత్తులకు అంతర్జాతీయ మార్కెట్లో అపార అవకాశాలున్నప్పటికీ, ఎగుమతి సామర్థ్యం పూర్తిస్థాయిలో వినియోగంలోకి రాలేదని వినతిపత్రంలో పేర్కొన్నారు. ఇందుకోసం సమగ్ర ఎగుమతి ప్రోత్సాహక కార్యక్రమం చేపట్టాలని కోరారు:
- చేనేత, జౌళి శాఖలో ప్రత్యేక చేనేత ఎగుమతి విభాగం ఏర్పాటు
- ఉత్పత్తుల అభివృద్ధి, నమూనాల తయారీ, అంతర్జాతీయ వాణిజ్య ప్రదర్శనలు, బయ్యర్-సెల్లర్ మీట్స్, బ్రాండింగ్ కోసం బడ్జెట్ కేటాయింపులు
- అంతర్జాతీయ మార్కెట్ అవసరాలకు తగిన డిజైన్ అభివృద్ధి, నమూనా తయారీలో మాస్టర్ వీవర్లు, చేనేత క్లస్టర్లకు సహకారం
- ప్రపంచ ధోరణులు, నాణ్యతా ప్రమాణాలు, సుస్థిరత, ఎగుమతి నిబంధనలపై మార్కెట్ మేధస్సు, సామర్థ్య నిర్మాణ కార్యక్రమాలు
- రాయబార కార్యాలయాలు, వాణిజ్య మిషన్లు, ఎగుమతి ప్రోత్సాహక మండళ్ల ద్వారా విదేశీ కొనుగోలుదారులు, రిటైల్ చెయిన్లతో అనుసంధానం
- తెలంగాణ చేనేత ఎగుమతి కేటలాగ్, డిజిటల్ ప్లాట్ఫారమ్ రూపకల్పన
- ఎగుమతి ప్రోత్సాహక మండళ్లు (EPCs), అంతర్జాతీయ సంస్థలతో కలిసి కొత్త మార్కెట్ల గుర్తింపు
కాటన్, పట్టు వస్త్రాలు, గృహాలంకరణ వస్త్రాలు, దుస్తుల మెటీరియల్స్, వారసత్వ వస్త్రాలను అభివృద్ధి చేయడానికి రాష్ట్రంలోని మాస్టర్ వీవర్లు సిద్ధంగా ఉన్నారని గజం అంజయ్య తెలిపారు. ప్రభుత్వం నుంచి సకాలంలో మద్దతు లభిస్తే నాణ్యమైన చేనేత ఎగుమతుల్లో తెలంగాణ అగ్రగామిగా ఎదగగలదని, దీనివల్ల చేనేత కార్మికుల ఆదాయం పెరగడంతో పాటు గ్రామీణ ఉపాధి అవకాశాలు మెరుగుపడి రాష్ట్ర ఆర్థిక వ్యవస్థ బలోపేతం అవుతుందని పేర్కొన్నారు.
ఈ కార్యక్రమంలో గడ్డిఅన్నారం మార్కెట్ కమిటీ మాజీ డైరెక్టర్ బండి మధుసూదన్ రావు, శ్రీ ప్రసన్నాంజనేయ స్వామి దేవాలయం చైర్మన్ తలాటి రమేష్ నేత, జెల్ల జగన్నాథం, పగడాల ఎల్లన్న, దోర్నాల చంద్రమౌళి, పొట్ట బత్తిని నగేష్ తదితరులు పాల్గొన్నారు.
